دليل شامل و مرشد لعبة كريمز و اهم الاسئلة و الاجابات للمبتدئين

[Oliversb89]

ازيكم يا مجرمين,

اهلا بيكم في دليل الكرايمز



يللا بينا ندخل بالاكاونت بتاعك

عشان تدخل اللعبه لازم تحط اليوزر و الباسورد اللي اتبعتولك في الايميل لما سجلت في اللعبه

اذا حطيت بيانات الدخول غلط هاتظهرلك الرساله دي



زي مانت شايف في الصورة اللي فوق انت ليك 5 محاولات للدخول باليوزر و الباسوورد. لو دخلتهم غلط اكتر من 5 مرات الاكونت بتاعك هايتقفل لمده ساعة و بعدين تقدر تحاول تاني

اذا نسيت الباسوورد او ايميل التسجيل ماوصلكش استخدم الاختيار ده زي اللي في الصورة



هايتبعتلك ايميل باليوزر و الباسوورد بتاعتك

ايه الهدف من اللعبه ؟

هدف اللعبة انك تفضل عايش في كل راوند - مده الراوند 152 ايام كرايمز بما يقابل 38 يوم في الحقيقه
الفايز هو اللي بيجمع اعلي احترام في الدورة. الفايزين الخمسه الاوائل في التصنيف العالمي بيكسبوا فلوس و رصيد. المركز الاول من كل دولة بياخد نيشان علي البروفايل بتاعه عشان الناس كلها تعرف. كمان في جوايز لأعلي 3 قتالين قتله اللي موتوا اعلي ناس في اللعبه. و اخيراً في ميداليه لكل عضو في العصابه الاعلي في الراوند

عشان تكسب لازم تستخدم كل خصائص اللعبه. السرقات الفردية و سرقات العصابه و بنات الليل و الاستثمار و غيرها .. كل حاجة هانشرحها بالتفصيل بس انت خليك مركز و اوعي تفيص مني

*----------------------------------------------------------------------------------------------*

ازاي ابدأ اللعبه ؟
كويس انك سألت انا عندي الاجابه اللي هاتريحك

تعالي بقي اشرحلك مميزات العضوية ال VIP

حزمة المهمين حتنمى خبرتك فى اللعبه .. و كمان حتكون لك تعامل منا غير باقى الاعبين . حزمة المهمين بتظل معاك لمدة (152 يوم كريمز),و إذا الدورة إنتهت قبل إنتهاء فترة حزمة المهمين الخاصه بك .. حيتم نقل ما تبقى من أيام معاك للدورة الجديدة ,, متقلقش إنت راجل برنس و إحنا لازم نعامل بأسلوب محترف يليق بسيادتك يا باشا .



إشترى حزمة المهمين .. حتستفيد بكل هذه المميزات:
- 20 حدث إضافى بيحدث فى 20 يوم مختلف من أيام كريمز ,, الأحداث بتكون مثلا زى سعر خاص جدا لشراء مخدر معين أو شاحنه حتوصلك الميناء علشان تشترى منك مخدر معين بسعر أعلى من سعر المخدر عند تاجر المخدرات الحرامى ده
- حتقدر تشترى أكثر من أى لاعب تانى بـنسبة 10% فى المبانى بصفه عامه
- دليل ملون على السرقات الفردية التى تستطيع أن تنفذها ( أخضر - أصفر - أحمر ) الأخضر هى السرقة المضمونه و الأصفر هى السرقة الغير مضمونه و الأحمر هى السرقة اللى حتكون نهايتك أكيد فى السجن .
- حتقدر تشوف و تعرف الفائدة يوميا على المبانى الخاصه بك

الاحداث الخاصه بحزمة المهمين VIP

الأحداث الخاصه بحزمة المهمين
بأعتبار إنك واحد من الأشخاص المهمين .. بيكون عندك أحداث إضافيه بتتميز إنت فقط بيها عن باقى الاعبين و هم عبارة عن 20 حدث بتظهرلك هذة الأحداث خلال الفترة الخاصه بشراءك لحزمة المهمين , الحدث الإضافى هو عبارة عن ميزة إضافيه بتحصل فى يوم معين من أيام كريمز . لازم تكون مركز مع كل يوم جديد فى أيام اللعبه لكى لا يأتى حدث بدون أن تستفيد به و بمميزاته . الأحداث بتتم بشكل عشوائى غير منظم بمعنى إنها ممكن يحصل حدث فى يوم 10 ثم يوم 110 ثم يوم 113 مثلا .. لكن فرص وجود شاحنة فى الميناء بتكون أكبر لك من أى شخص أخر . الأحداث اللى ممكن تستفيد بيها هى :
فلوكة مشبوهة في المينا
الفلوكة دي نسخة مصغرة من السفينة. ولما بتوصل عالم الجرايم كل فترة، الفلوكة دي بتشتري كمية محددة من المخدرات بسعر أعلى من السعر اللي بيشتري بيه تاجر المخدرات منك. كمية المخدرات المحدده اللي بتشتريها الفلوكة دي بتزيد كل فترة بتيجي فيها على مدار الدورة كلها.
شاحنة المينا
اللوري ده هيشتري منك كمية محددة من المخدرات بسعر أعلى من السعر اللي بيشتري بيه تاجر المخدرات. كمية المخدرات اللي هيشتريها كل مرة هتبقى أزيد خلال الدورة.
الأسعار رخصت!
في اليوم ده سعر المخدر هينزل الأرض بغباء! دي فرصة نار عشان تشتري من المخدر ده بسعر أحسن وأرخص.
الأسعار ولعت!
لما اليوم ده بيجي هتاخد سعر أعلى على مخدر معين من تاجر المخرات. السعر بيتغير في عمليات البيع والشراء. لو معاك حبة مخدرات زيادة ومحيرينك يبقى ده الوقت المناسب عشان تبيع.

دلوقتي عشان تكمل اللعب صح يبقي انا بنصحك تشتري سلاح و درع. كل ما تشتري سلاح او درع بيتفعل لوحده . انت هاتلاقي الاسلحة في الصفحة دي



ممكن تبدا بسلاح زي ده مثلا في الاول



اول ماتشتري سلاح او درع هاتلاقيهم اتنشطوا و ظهروا تحت قدراتك زي في الصورة دي



ممكن تشتري ذخيره للسلاح بتاعك عشان تزيد قوته
" هتزود قوة سلاحك بنسبة 30%. الشنطة من الحاجات دى هتكفيك 28 يوم من ايام كريمز. هتاخد الشنطة قصاد 10 رصيد "

هاتلاقيها هنا زي الصورة دي



يللا بقي نروح نعمل شوية سرقات

انت هاتعمل سرقات فردية بس .. مش هاتقدر تعمل سرقات جماعيه الا بعد ما تنضم لعصابه. كل السرقات هاتلاقيها في صفحة السرقات


كل السرقات هاتبقي ملونه بألوان مختلفه زي الصورة اللي جايه دي
اول ما احترامك يوصل 200 دليل الالوان ده هايختفي
الاخضر يعني سرقه مضمونه .. الاصفر يعني في مخاطرة انك تتمسك .. الاحمر بقي يعني هاتشرف في السجن يا برنس خللي بالك ماتعملش سرقه صعوبتها اعلي من قدراتك



اذا قررت انك تشتري حزمة المهمين اللي اتكلمنا عليها فوق . كل السرقات هاتفضل متلونه حتي بعد ما تعدي ال 200 احترام. السرقات بتزيد صعوبتها كل شوية. انت الاول هاتبدا ب 7 سرقات بس و كل ماتزيد بمستوي شخصيتك هاتلاقي سرقات جديدة بتتفتح ليك
عشان تشوف شخصيتك و المستوي هاتلاقيهم تحت اسمك علي اليمين



الطاقة خلصت اعمل ايه ؟؟

الطاقة بتعتك هاتتشحن لوحدها مع الوقت و سرعة الشحن بتعتمد علي معنوياتك. لو كانت مرتفعه جدا يبقي هاتشحن بسرعه اكتر ولو كانت قليله يبقي هاتاخد وقت اكتر

عشان ترفع الطاقة بسرعه ممكن تخش اي ديسكو و تضرب مخدرات
عشان توصل هناك دوس علي الحياة الليليه زي الصورة دي



دور علي خمارة او ديسكو و ادخل



اول ماتدخل الديسكو او الخمارة هاتلاقي مجموعه متنوعه من المخدرات . جنب كل مخدر حط هاتشتري كام ( من 1-99 ) و دوس اشتري و هاتلاقي الطاقة بتاعتك عليت.
في بعض الحالات المخدرات بتبقي مضروبه ف الطاقة بتاعتك هاتنقص و هاتدفع فلوس علي الفاضي

القايمة اللي جاية دي فيها كل مخدر و تأثيره كام في المية علي طاقتك .. خللي بالك كل ما مستوي الادمان بتاعك يزيد تأثير المخدرات بيقل يعني هاتضر تشتري كميات اكبر عشان تعللي طاقتك للأخر

Painkillers 1%
Weed 1%
Booze 2%
Magic mushrooms 2%
Hash 2,5%
LSD 3%
Ecstacy 4%
GHB 4%
Amphetamine 5%
Opium 6%
Cocaine 7%
Special k 7%
Morphine 8%
Heroin 8,5%

ادي شكل الديسكو او الخمارة لما تدخل تضرب مخدرات



انا قابلت حد ف الخمارة - اعمل ايه ؟

ماتقلقش انك تقابل حد في الخمارة الا بعد ماتوصل 200 احترام. لانه اول ماتوصل 200 هاتبقي معرض للهجوم من مجرمين تانيين. خليك بعيد عن الخمارات المشهوره عشان تتجنب انك تنضرب
الخمارات الرسمية دي هاتلاقيها بخط عريض وكبير و ادي مجموعه من الخمارات دي

Aquarius, The Loft, Bazement, Tivoli, The Dug, Blizzout, Cantina, The Outpost, Blue Oyster.

:لما تقابل حد في الخمارة انت معاك 3 اختيارات في الحاله دي
1. اذا كنت واثق انك ممكن تموتهم بالهجوم عليهم يبقي اتكل علي الله
2. ممكن تاخد جرعه زيادة من المخدرات و تخش المستشقي و ساعتها ماحدش هايقدر يضربك و احترامك و قدراتك هابفضلوا زي ماهما
3. روح المستشفي بسرعه و اعمل عمليه تحميل و ساعتها كل العلاقات المؤقته من الديسكو هاتختفي

اهم طريقه عشان تتفادي الهجوم عليك انك تشتري ديسكو خاص بيك ساعتها هايبقي صعب تتقابل مع ناس تاني و كمان حدد الاحترام اللي يقدر يدخل الديسكو .. خليه علي نفس مستوي احترامك عشان انت كمان تعرف تدخل الخمارة

تعالي بقي نشوف ازاي تهاجم المجرمين التانيين

زي ما قولنا قبل كده ماحدش هايقدر يهجم عليك الا لما احترامك يعدي 200. في نوعين من الهجوم في اللعبه
الهجوم الفردي و هجوم العصابات
عشان تعمل هجوم فردي لازم تكون في ال 200 احترام . و عشان تشارك ف هجوم العصابه لازم تكون اعلي من 500 احترام و تكون في عصابه فيها علي الاقل لاعب تاني غيرك

ملحوظة: عشان تهاجم حد لازم تكون طاقتك علي الاقل 50% . في خاصية اسمها * الحمايه * دي هاتفضل متفعله لحد اليوم الي 16 من ايام كرايمز او لما تعدي الي 5000 احترام

عشان تهاجم حد لازم تكون العلاقه لونها احمر .. هاتلاقي علاقات حمراء مع الناس اللي بتقابلهم في الخمارات والديسكو .. اول ما تقابل حد امشي علي الخطوات اللي جاية دي

روح علي صفحة الهجوم




اختار نوع الهجوم اذا كان فردي او هجوم عصابه جماعي

اختار الضحية اللي عايز تنفخها

بعد ما تختار الضحية دوس علي كلمة " اهجم "

بعد ماتنفذ الهجوم هايوصلك رساله في الرسايل بنتيجة الهجوم و النقط اللي كسبتها لو خسرتها مثلا في الصورة اللي جاية دي انت خسرت الهجوم
خللي بالك و انت بتعمل هجوم في التحدي انت قوتك لازم تكون ضعف قوه خصمك عشان تموته. خللي بالك كمان من شخصيه الخصم لان في شخصيات قدراتها الهجومية ضعيفه جدا ف حتي لو النقاط بتاعتكم زي بعض او انت اكتر شويه برضه لسه في احتمال انك تخسر التحدي



ازاي ادعي ناس لعصابتي ؟

عشان تعمل عصابه لازم تكون علي الاقل 50 احترام
عشان تدعي ناس للعصابه انت ممكن تدخل البروفايل بتاعهم و دس علي كلمة - أعزم
زي الصورة دي كده


ازاي اعدل علي بروفايلي ؟

عشان نسهل عليكم احنا عملنا زرار جديد اسمع - ملفي الشخصي - من فوق علي الشمال بالتحديد جنب زرار الرصيد
هاتلاقي 5 اختيارات هانشرحهم بالتفصيل


- المستويات -
هنا هاتشوف انت مستوي ايه و كمان ايه المطلوب منك عشان توصل المستوي الي بعده


- الشخصيه - خللي بالك انت ممكن تغير شخصيتك مرة واحده بس عشان كده اختار كويس



-تعديل البروفايل - هنا تعدل بياناتك و الصورة و اذا كنت عايز تستقبل رسايل من اللاعبين الاخرين ولا لا .. الخ الخ



-نغيير كلمة السر - دي تغير بيها الباسوورد بتاعتك و لازم تعمل تفعيل من الرساله اللي هاتجيلك علي الايميل


تغيير الاسم - انت ليك مره واحده بس مجانا كل دورة بعد كده هاتدفع 20 رصيد عشان تغير الاسم تاني


يللا بقي نتعلم باقي خصائص اللعبه



في الدورات الاخيره الخاصيه دي بقت مهمة جدا جدا في اللعبه . شخصية القواد دي عندها ميزه ان اسعار الحريم ارخص و بيدوك فلوس اكتر كل يوم . عشان تزود الفلوس بتاعة حريمك يبقي لازم تزود الجاذبيه بتاعتك . كل ماتشتري موزة سعر المزة اللي وراها هايزيد





ممكن كمان تشتري حبوب تزود انتاج الحريم بتوعك . هاتكلفك 10 رصيد و هاتستمر معاك لمده 28 يوم من ايام كرايمز



ناجر السلاح



زي ما قولنا في البداية تاجر السلاح بتشتري منه اسلحة و دروع .. خللي بالك اول ماتشتري سلاح انه بقي منشط

ممكن كمان تشتري ذخيره تزود قوة سلاحك 30% لمده 28 يوم كرايمز و هاتكلفك 10 رصيد


و ادي الاسلحة



دلوقتي ممكن تشتري الرشاش الالي الفتاك من اول يوم زي مانت شايف كده ب 30 رصيد
كمان ممكن تشتري الدرع المصفح الذهبي ب 30 رصيد



ناجر المخدرات


تاجر المخدرات ممكن تشتري منه مخدرات عشان تملا الديسكو و الخمارة بتوعك و ممكن تشتري منه مخدرات عشان المراكب اللي جايه ف المينا . او ممكن تبيع للتاجر المخدرات اللي المصانع بتاعتك انتجتها و ده بيديك فلوس و احترام
خللي بالك لما بتبيع مخدر للتاجر بتخسر 5% من قيمة المخدر . كل مرة تبيع حاجة عنده هايكلفك 5 طاقه



المصانع


المصانع دي طريقه كويسه قوي عشان تكسب فلوس كتير و احترام كمان لما تبيع المخدرات . لو انت مشترك في حزمة المهمين VP
هاتقدر تشوف المكسب اليومي . خللي بالك ان التحميل هو اللي بيحدد كام مصنع تشتري .. و الذكاء بيحدد كمية انتاج المصنع من المخدرات
خللي بالك كل مصنع ليه تكلفه صيانه كل يوم لازم تخللي معاك فلوس ف ايدك تكفي المصانع كلها و الا مش هاتنتج المخدرات مع بداية كل يوم جديد ف اللعبه



من تحت هاتلاقي المصانع اللي انت مشتريها
و تحتها اختار المصنع و دوس جمع المحصول عشان تحمع المخدرات و تبيعها بعد كده


ممكن تزود انتاج المصانع 10% . هاتكلفك 10 رصيد و هاتستمر معاك 28 يوم كرايمز


الحياة الليليه


الحياة الليليه هي المكان اللي تروح فيه عشان تشحن طاقة و تضرب مخدرات . ممكن تحفظ اي ديسكو في المفضلة و عشان تعمل كده لازم تدوس علي زرار + اللي جنب اسم الديسكو
مش محتاج تذاكر عشان تخس الخمارة او الديسكو .. بس هاتكلفك فلوس دخول .. بس هاتتخصم منك تذكرة اول ما تشتري مخدرات من الديسكو او الخمارة
اول ماتبدأ اللعبه انت بتاخد 150 تذكره و التذاكر بتتملي تاني لوحدها كل دقيقه بحد اقصي 70 تذكره .. التذاكر بتزيد لما مستواك يعلي في اللعبه.
لو عايز تبقي في الامان من هجوم الناس التانيه اشتري خمارة او ديسكو و اعملها في المفضله عشان تخشها هي بس

في ناس بتستخدم الخمارات و الديسكوهات عشان تصطاد ضحايا تموتهم . اشهر خمارات هي خمارات كرايمز الرسمية كمان اي خمارة او ديسكو فيها مخدرات كتير غالبا بيبقي فيها ناس اكتر



المشاريع


المشاريع دي بتشتري منها الخمارات و الديسكو و كمان بيوت الدعاره عشان الحريم بتوعك يعرفوا يعملوا شغلهم مع الزباين
انت ليك انك تشتري 3 خمارات او ديسكوهات كحد اقصيممكن تحط فيهم المخدرات اللي معاك عشان الناس تستخدمها او انت كمان تستخدمها لما تحب تملي طاقه



بعد ماتشتري خمارة او ديسكو لازم تحط فيهم المخدرات و تديها اسم + تحدد الاحترام المسموح بيه عشان الناس تدخل و تحدد سعر المخدرات كمان


المستشفي


المستشفي هاتشرف فيها يا برنس لما تنضرب من حد فردي او من عصابة تانيه
لما تدخل المستشفي مش هاتعرف تستخدم اي حاجة ف اللعبه الا بعد ما تطلع و تقوم بالسلامة
انت ممكن تشتري عنايه خاصة من المستشفي تطلعك منها في الحال و هاتكلفك 10 رصيد
لو انت مش مضروب من حد ممكن تزور المستشفي تشتري قدرات ليك او علاج للادمان
كل ماتشتري قدرات سعرها هايعلي و احترامك هاينقص


كمان في المستشفي ممكن تعمل عمليه تجميل . دي تستخدمها لو عايز تخلص من العلاقات الحمرا مع الناس اللي قابلتهم في الخمارات عشان ماحدش يضربك
في حاجة تاني كمان اللي هي حقنة المورفين دي هاتعالح ادمانك و ترجعه 0% من تاني بس هاتكلفك فلوس و احترام علي حسب مستواك
اخر حاجة لو انت مجدع و عايز تطلع صاحبك من المسشتفي ممكن تدفعله فاتورة العلاج


السجن


انت ممكن تشرف السجن لاسباب متعدده منها انك قتلت حد بوحشيه او العصابة فشلت في تنفيذ مهمة معينه او انك حاولت تشرف حاجة اكبر من قدراتك و اتقفشت
لما تخش السجن ممكن تشوف الوقت اللي هاتخرج فيه امتي
ملحوظة مهمة : مافيش اي شفرات تطلعك من السجن بدري . اذا كنت عايز تطلع بدري في طريقتين
الاولي انك تدفع رشوه للحارس و بتكون غاليه قوي - خللي بالك الحارس لو ماقتنعش بالملبغ مش هاتعرف تهرب و برضه هاياخد الفلوس منك بلطجة كده
الحارس بيقولم انا عايز رشوه في حديد من كذا الي كذا .. جمع المبلغين علي بعض و اقسم علي 2 .. عشان تضمن انك تدفع الملبغ و تطلع بقي تكمل اجرام
او ممكن تهرب من السجن ب 10 رصيد في الحال

البنك المركزي


البنك ده مهم جدا عشان تشيل فيه الفلوس اللي مش محتاجها و تاخد عليها فايده
كمان بيحمي فلوسك لانك لما تفشل في تنفيذ عمليه او هجوم بتخسر فلوس كتير
اول 100.000 تحطهم في البنك هاتاخد عليهم فايده 2% كل يوم و اي حاجة ازيد من كده عليها فايده 0.1% كل يوم .. خللي بالك كل مرة تحط فلوس او تسحب فلوس هاتكلفك 3 طاقه

كمان ممكن تستثمر فلوسك مع المستثمرين . عشان تستثمر هاتكلفك 5 رصيد و هاتستمر 4 ايام كرايمز (
في الفترة دي مش هاتقتدر تستخدم الفلوس اللي استثمرتها . هاتاخد نسبه 4% بعد ماتخلص مده الاستثمار
لو عايز تلغي الاستثمار هاتخسر 2% من فلوسك
المستثمرين موجود في المدينه لحد اليوم 100 كرايمز بعد كده هايمشوا و مش هاتقدر تستثمر الا مع الرواند الجديدة



الكازينو


الكايزنو ده للترفيه فقط . من الصعب انك تعمل فلوس كتير هنا .. احسنلك انك تعمل سرقات و مهمات مع العصابه
في 3 انواع للعب في الكازينو


المينا


المينا من الحاجات الاساسيه في اللعبه
في المينا بتيجي سفن بطريقه عشوائيه علي مدار الرواند بتطلب مخدر معين ف كل مره . و بتشتري منك بسعر اعلي من التاجر
ممكن تعرف ايه السفينه اللي جايه من القبطان و هاتكلفك 10 رصيد كل مرة

لو انت من حزمة المهمين في اللعبه هاتجيلك سفن اصغر مخصوص ليك انت بس بس مش هاتعرف ايه المخدر المطلوب الا لما توصل المينا
اول ماتعرف ممكن تروح للتاجر تشتري و تبيع للسفينه بسعر اكبر و تعمل فلوس
او لو عندك اصحاب ممكن يسلفوك شوية مخدرات


مركز التمارين



مركز التمارين ده مكن كويس قوي عشان تتمرين و تكسب قدرات لما تكون مثلا مش فاضي تعمل سرقات او تلعب اللعبه في وقت معين
التمارين مدتها هاتزيد لما تعلي بمستوي شخصيتك
كل تمرين مختص انه يزودلك قدرات معينه و انت تختار عايز ايه



مكتب المخابرات


المكتب ده مفيد عشان تتجسس علي اللاعبيه التانيه و العصابات كمان



اول ماتشتري الحزمة اللي انت عايزها روح علي بروفايل اللي هاتتجسس عليه ودوس تجسس علي اللاعب


ميدان الدردشه


ده من الاخر المكان اللي تحكي فيه مع لاعيبه تاني .. في ناس بتستخدمة عشان تجمع ناس للعصابات
بس خللي بالك في ناس
ممكن تضحك عليك و تدعيك للعصابه بس عشان يعرف قدراتك و ينفخك بعدين - الدنيا مافيهاش امان اساااحبي

نادي التحدي


نادي التحدي معمول عشان تتحدي ناس تاني من غير ماتخاطر بدخول الخمارة او الديسكو . عشان تتحدي حد دوس علي كلمة " اتحدي " . و خصمك هايوصله رساله انك عايز تتحداه
بعدين روح علي صفحة الهجوم وشوف هل قبل التحدي ولا لا
كمان ممكن انت تدخل نادي التحدي و تخللي الناس هما اللي يطلبوا التحدي منك . دوس علي " اتحداني " و اسمك هايظهر للناس التانيه و بالتوفيق في الخناقة يا معلم





خللي بالك في ناس في نادي التحدي بتبقي مستعمله التمرين عشان تعلي قوتها الهجومية و التحمل . يعني ممكن واحد يكون احترامة 50.000 بس قدراته 100.000 من التمرين
كمان خللي بالك بداية من الدورة 63 احنا قررنا ان القتل اللي في نادي التحدي مش هايتحسب من عدد مرات القتل . عشان نشجع المجرمين علي القتال

العصابة الافتراضيه


العصابة الافتراضية دي خاصية جديدة في اللعبه . دي واحده من الافكار عشان نسهل علي الناس انها تبدا في اللعبه . العصابة دي هاتحصل عشوائي في اللعبه في ايام معينه خلال الراوند

• بتظهر بعشوائية في اللعبة ف ايام معينه و بتسرق سرقات مختلفه ف كل مرة
  زعيم العصابة هاينفذ السرقة اللي جاية اول ماتخلص السرقه الاولي او لما الاعضاء مش قادرين يبدأوا سرقه جديدة
  لازم تكون قدراتك قد السرقه اللي بتعملها العصابه عشان تقدر تخش مع العصابه
  التقدم للعصابة بالترتيب يعني لو قدمت الاول يبقي هاتتقبل الاول
  لو خسرت قدرات لاي سبب و بقت اقل من السرقه بتاعة العصابه هاتنطرد تلقائيا من العصابه
  اذا كنت اقوي من العصابة بكتير يبقي مش هاتتقبل في العصابة
  مع كل عصابة افتراضية انت ممكن تكمل معاهم 50 سرقه كحد اقصي في كل مرة يظهروا في المدينه
  اي لاعب غير نشيط هايتم طرده من العصابه عن طريق حساب نسبه المشاركة في السرقات
  اقصي عدد مسموح بيه في العصابة هو 200% من العدد المطلوب للسرقه .. مثلا ال كابوني 22 لاعب
  العصابة دي ماينفعش تتهاجم او انها تهاجم عصابات تاني
  العصابة مش هاتظهر في عداد العصابات

الحارة


الحارة دي خاصية جديدة في اللعبه . من خلالها هاتلاقي مهمات تعملها هاتكون مفيدة ليك في بداية اللعبه و كمان خلال الراوند كلها

العضوية المحمية


الخاصية دي عملناها عشان ندي المبتدئين فرصه يتعلموا اللعبه في البدايه و عشان يبقوا محميين من هجوم الناس الخبيره في اللعبه عشان ياخدوا فرصتهم
الحماية هاتستمر 16 يوم كرايمز او لحد ما اللاعب يوصل 5000 احترام
ممكن تشيل الحماية بنفسك من البروفايل بتاعك

ملحوظة: العضوية المحمية ممكن تعمل عصابة محمية . اول ما الزعيم يطلع من الحماية .. اي اكونت محمي تاني هو هايبقي الزعيم


الشخصيات و المستويات

اللعبه فيها 5 شخصيات و كل شخصيه ليها مستوياتها الخاصه بيها. كل شخصية ليها 11 مستوي في اللعبه. بعد ماتعدي كل مستوي بتاخد جوايز فلوس و مخدرات و غيره .
عشان تعرف تفاصيل اكتر عن المستويات و الشخصيات اضغط هنا

تجميع ناس جديدة
ممكن تكسب كاشات زيادة لو جبت اصحابك او ناس تانية كمان عشان تلعب و احنا حنزودك $5 في حسابك في بنك كريمز علي كل واحد يزور اللينك بتاعك او ممكن تستخدم الإستمارة الي تحت عشان تجمع اصحابك


*------------------------------------------------------------------------------------------------------------------------*

كده انت اتعرفت علي كل حاجة تقريبا في اللعبه

ادي كمان شوية اسئلة شائعه عن اللعبة

هل توجد شفرات للعبه ؟
لا مافيش اطلاقا

كم هي مده اليوم في كرايمز ؟
6 ساعات حقيقيه

ازاي استخدم الرصيد؟

*تشتري حزمة المهمين - 50 رصيد
* اشتري حزمة المساعده في البدايه - 10-20 رصيد
* اعرف السفينه اللي جاية - 10 رصيد
* اهرب من السجن او هرب صديقك - 10 رصيد
* اخرج من المستشفي بدري - 10 رصيد
* اشتري ذخيره للأسلحة - 10 رصيد لمده 28 يوم كرايمز
* زود انتاج المصانع - 10 رصيد لمده 28 يوم كرايمز
* زود فلوس الحريم 10% - 10 رصيد لمده 28 يوم كرايمز
* استثمر فلوسك في البنك - 5 رصيد
* اتجسس علي اللاعبين - 5 رصيد
* اتجسس علي عصابة - 10 رصيد
* تغيير اسمك في اللعبه - 20 رصيد - و كل دورة ليك ورة واحد بس مجانا

ازاي احسب الرشوه للسجن ؟
اجمع المبلغين المطلوبين و اقسم علي 2 . مثلا المبلغ ما بين 77.418 - 95.583 = يبقي جمع الاتنين و اقسم علي 2

التذاكر خلصت اعمل ايه ؟
في اول الراوند هاتاخد 150 تذكره . بعدين هاتاخد تذكره كل 5 دقايق يعني 12 تذكره في اليوم كحد اقصي . الحد الاقصي للتذاكر 70 لكن بيزيد لما تزود مستواك

ليه المصانع ما انتجتش مخدرات ؟
المصانع محتاجة فلوس عشان تنتج المخدرات .. لو مش معاك فلوس ف ايدك مع بداية كل يوم يبقي خاتخسر الانتاج

انا و صاحبي في عصابة و هاجمنا واحد اقل مننا بس خسرنا . ازاي !!! ؟
غالبا الاعب دع كان ف عصابة يمعني انك لما عملت الهجوم دخلت ضد العصابة كلها مش هو بس
ولو هما اعلي من عصابتك يبقي اكيد هاتخسر

كيف يتم حساب الاحترام؟
الاحترام بيبقي عبارة عن متوسط اجمالي قدراتك . كل 4 نقط قدرات = 1 احترام
كل 10.000.000 فلوس = 1000 احترام
كل عمليه قتل = 1 احترام

ايه لازمة كود التفعيل في بعض السرقات ؟
عشان نمنع او بوت الي او سكربت انه يستخدم اللعبه


ازاي اخد جرعه زيادة و هافضل في المستشفي قد ايه ؟
الجرعه الزياده عن طريق انك تاخد كمية كبيرة قوي من مخدر معين في الديسكو او الخمارة
مده المستشفي حوالي 4 ساعات كرايمز = 1 ساعه حقيقيه

*----------------------------------------------------------------------------------------------------------------------*

شوية نصائح للمبتدئين في اللعبه


* اقرا قوانين اللعبه و افهم كل جزء فيها اذا مش فاهم حاجة ماتترددش انك تراسلنا و احنا هانساعدك
* حاول علي قد ما تقدر تكون صداقات قوية عن طريق ميدان الدردشه او سكايب مع باقي اللاعبين
* ماتستعجلش و حاول تستمع بوقتك في اللعبه
* ماتخسرش اصحابك بسهوله لان ده هايكلفك كتير
* دايما حاول تثبت للناس انك محل ثقه و مش خاين
* لما تخش عصابه خليك عضو نشيط فيها
* لو لاحظت اي مشاكل في اللعبه ابعت لينا فورا عشان نصلحها
* اوعي تستخدم اي ثغرات ي اللعبه و الا سيتم ايقافك
* لو عندك اسئله عن اللعبة دايما زور المواضيع المثبته في المنتدي و هاتلاقي الاجوبه
* لو مش لاقي اجابه لسؤالك في المنتدي يبقي راسل قسم الدعم الفني
* ماتتكسفش لو عندك استفسار .. الاحسن انك تسأل و تفهم بدل ماتعمل حاجة غلط تندم عليها
* ماتحاولش تستخدم اي برامج عشان تلعب اللعبه . احنا هانعرف و هاتتعاقب
* اوعي تفتكر انك عمرك ماهاتكون من الاوائل . كل الاوائل بدأوا زيك ك مبتدئين

لو لسه محتاج مساعده بعد الموضوع ده اتبع الاتي
* اعمل موضوع في المنتدي الخاص باللغه العربية و احنا هانرد عليك في اسرع وقت
* زور اللينك ده http://www.thecrims.com/contact.php ممكن يكون فيه حاجات تساعدك
* لو كل ده فشل يبقي ابعتلي رساله علي المنتدي و انا هارد عليك

بالتوفيق للجميع

[kitkat]

Teslm ya m3lm , be amana Enta 3amel sho3'l 100\100, a7san men 3'erk bkteer rbna ywf2k ya pop

طيب انا عايز موقع للاله الحاسبه عشان متسجنش

السلام عليكم
انا اريد انا اعرف شى يخص هذه اللعبه انا اشتريت نادى ليلى بس لما باجى اخش هذا النادى مش بدخل وبيقولى انى لا يسمح لك بالدخول غيرها من الأندية المحمية ممكن اعرف اعمل ايه عشان اخش النادى بتاعى

[J0KER1]

السلام عليكم
انا اريد انا اعرف شى يخص هذه اللعبه انا اشتريت نادى ليلى بس لما باجى اخش هذا النادى مش بدخل وبيقولى انى لا يسمح لك بالدخول غيرها من الأندية المحمية ممكن اعرف اعمل ايه عشان اخش النادى بتاعى

لقد تمت اجابتك في الموضوع الذي عملت

[abe190]

عايز اعرف ازاى نقاط الهجوم بتتحسب؟