اسئل واستفسر عن اي حاجة فاللعبة

[Generozo]

انا يعتبر لسه جديد اخر مرة لعبت كان من سنين

دلوقتى انا لسه داخل عصابة افتراضية و مش عارف اتبرع منين و فى المشاريع زى الخمارة مش عارف احدد سعر اى حاجة هو بيحطلى لوحده سعر اى حاجة 15 و مينفعش احدد رسوم الدخول

أهلا بيك معانا من جديد

بالنسبة للعصابة الافتراضية دورها فقط فى عمل سرقات العصابة فى حالة انك مش لاقى عصابة تنضم ليها عشان تنفذ السرقات المطلوبة منك.
بخصوص التبرع . العصابة الافتراضية مفيهاش امكانية للتبرع و بالتالى الحل البديل هو إنك ممكن تعمل عصابة لوحدك و من مركز العصابة حتلاقى اكتر من خاصية موجودة . روح على خاصية الترقية أو التطوير . و حط المبلغ المطلوب التبرع بيه فى اى قسم خاص بتطوير العصابة عشان تأدى المهمة المطلوبة منك للتبرع.

بخصوص سعر الخمارة . الاعب اصبح ملهوش اى دخل فى تحديد سعر الخمارة او فى تحديد سعر المخدرات اللى جواها . السعر بيتحدد اوتوماتيك على كل الاعيبة وفقا لسعر المخدر المباع عند تاجر المخدرات

بالتوفيق

[easelim]

السلام عليكم،، انا ليا فترة مكنتش بلعب و دلوقتي فوجئت بإختلافات كتير ،، كنت عاوز افهم المزاد اللي على مكونات المخدرات ازاي بستفيد منه

[Generozo]

أهلا بيك معانا من جديد

للامانة انا المفروض اعمل فيديو كامل عن موضوع المزاد و المعمل و كل حاجه خاصة بيهم لكن للاسف مش فاضى خالص . عموما ان شاء الله البوست ده حيكون شافى و كافى ليك و لأى حد مش عارف ايه هو المزاد او المعمل .

المزاد هو المكان المسئول عن بيع مكونات المخدرات و اللى انت المفروض بتشتريها من خلال المزاد ده فى حالة أنك كسبته و مكونات المخدرات دى هى اللى انت بتستخدمها علشان تدخلها فى المعمل بتاعك وهو ما يسمى ب
( Laboratory ) عشان تنتج مخدرات نهائية تقدر تبيعها لتاجر المخدرات

المعمل او ما يسمى ب ال Laboratory
هو زى المصنع بالظبط وظيفته شرحتها لك ولكن مهم تعرف انك تقدر تعمل له ترقيه او تطوير علشان تخلى المعمل ده ينتج فى وقت أسرع و كمان ينتج كميات اكبر . المستوى الرابع هو اعلى مستوى لتطوير المعمل و كمان

لمعلوماتك بس و هى ان طريقة حصولك على مكونات المخدرات ممكن تكون عن طريق عمل سرقات فردية معينة اللى بيكون موضح فيها ان المكسب هو مبلغ معين من الفلوس و كمية معينة من مكونات المخدرات أو عن طريق المزاد

نرجع للمزاد - هو بينزل فى وقت معين و له موعد انتهاء معين . وفى شروط معينة كده لازم تبقى عارفها عشان تبقى صايع فى التعامل معاه

المزايدة مرة واحده فقط للمزاد الواحد - يعنى لو حطيت مبلغ معين فى مزاد معين و لقيت حد تانى زود عليك سعر المزايدة مش حتقدر تزود انت كمان المزايدة
المزايدة المسموح بها حتى تاريخ هذا البوست هى 5 مرات فى يوم كريمز الواحد - 5 مرات دى اقصد بيها 5 مزادات مختلفة لأن زى ما شرحت ف النقطة السابقة . كل مزاد ليه مزايدة واحده بس من كل لاعب

طريقة حساب المزاد - ازاى تعرف اذا كان المزايدة اللى انت حتدخلها على المزاد كسبانه ولا خسرانه
بسهولة ممكن تحسب كمية مكونات المخدرات اللى انت حتاخدها من المزاد و تحسب لما تدخلها فى المعمل عشان تصنعها و تطلع مخدرات نهائية و تشوف سعر المخدر النهائى عند تاجر المخدرات حيبقى بكم بعد البيع و بعد خصم نسبة تاجر المخدرات
حتقارن بين سعر شراء مكونات المخدرات اللى حتشتريها و بين سعر بيع المخدرات النهائية بعد بيعها لتاجر المخدرات او للمركب و انت ساعتها حتعرف اذا كنت حتبقى كسبان ولا خسران

أخيرا معلومة مهمة و محورية عشان متخسرش اى مزاد . خليك صايع و ادخل المزاد قبل انتهائة بثوانى و حط السعر اللى محدش يقدر يعلى عليك بيه و الا حيكون خسران
امشى بالمثل اللى بيقول من يضحك أخيرا . يضحك كثيرا

يارب يكون الموضوع كده واضح و مشروح بشكل كامل متكامل

بالتوفيق

[easelim]

متشكر جدا ليك طبعا شرح وافي ،، عندي سؤال كمان ازاي احسب المكونات هتنتجلي كام مخدر نهائي ،، يعني لو عندي مليون مكون افيون هينتجلي كام مخدر افيون ؟

[Generozo]

النسبة هى 0.334
يعنى مكون الافيون معاك منه مثلا 3 مليون
يبقى حينتجلك أفيون نهائى 1,002,000

المعادلة هى ان مكونات المخدرات لمخدر معين مضروب فى 0.334 حتديلك كمية المخدر النهائى
تطبيق النظرى على المثال السابق فى المعادلة الأتيه
3,000,000 * 0.334 = 1,002,000

انت تقدر تعرف المعلومة دى بنفسك . لو دخلت على المعمل بتاعك و كان عندك اى كمية من اى نوع من مكونات المخدرات و دخلتها فى الخانة المخصصة للانتاج . حتلاقى الرسالة اللى ظهرتلك هى كمية المخدرات اللى حتكون جاهزة كمخدر نهائى للبيع لتاجر المخدرات و حيعرفك كمان ان انتاجها حينتهى امتى

بالتوفيق

[N0one]

السلام عليكم .... خو مافيش طريقه اضبط بيها شرب الهروين .... يعني انا مثلاً ببدأ ب 12 وحده ولما الاقيهم بيعملو 99% بروح ضارب 13 في المره اللي بعدها وهكذا .... بس اوقات كتير بروح المستشفى ... فهل في طريقه سريعه اعرف أخد قد ايه وامتى ازود ؟؟

[Generozo]

و عليكم السلام

كل مخدر بيأثر على نسبة زيادة الطاقة بتاعتك . أقوى مخدرات هو الهيروين بتاخد منه 12 و بتلاقى الطاقة اصبحت 100% ولكن خد فى اعتبارك ان كل ما بتدخل خمارات و بتضرب مخدرات حتلاقى نسبة الادمان بتاعتك بتزيد من 1 الى 2 و هكذا و فى كل مرة هى حتكون السبب ان ال 12 حتة دول مش حيأثرو معاك و مش حتقدر توصل إلى 100% طاقة بعد كم مرة . ولازم تزود الجرعة بتاعة الهيروين . أو تقلل ادمانك من المستشفى.
انت لو بتحب تضرب هيروين فى خمارتك . يبقى الافضل انك تحفظ انت بتضرب كم حبة عشان مع تسلسل الطاقة بالتزامن مع نسبة الادمان بتاعتك
مثال : لما تكون نسبة ادمانك 0 - يبقى و انت داخل الخمارة حتاخد 12 عشان تبقى طاقتك 100% من مرة واحدة
لما تكون نسبة ادمانك 2 او 3 يبقى و انت داخل حتاخد 13 عشان الطاقة تبقى 100% من اول تعامل و متبقاش مضطر انك تستنى فى الخمارة كتير عشان تزود الطاقة بتاعتك اكتر.

بالتوفيق